شاعیر: ئەحمەدی خانی (١٦٥٠-١٧٠٧)
زمان: کوردیی باکووری
قاڵب: مەسنەوی
کێش: مفعولُ مفاعلن فعولن 
{literal} {/literal}
دیباچە
سەرنامەئێ نامە نامێ ئەللا
بێ نامێ وی ناتەمامە وەللا
ئەی مەتلەعێ حوسنێ عشقبازی
مەحبووبێ حەقیقی و مەجازی
نامێ تەیە لەوحێ نامەیا عشق
ئسمێ تەیە نەقشێ خامەیا عشق
بێ نەقشێ تە نەقشێ خامە خامە
بێ نامێ تە نامە ناتەمامە
نامێ تەیە شاھ بەیتێ مەقسوود
فھرستێ موکاتەباتێ مەحموود
مەزموونێ موراسەلاتێ لارەیب
مەشھوودێ موکاشەفاتێ بلغەیب
مەحبووبێ قولووبێ من لەُ القلبْ
قەلبان تو دکی ب با خوە ڤەن جەلب
مەعشووق تویی ب فەخر و نازی
عاشق تویی لێک بێ نیازی
موتلەق تو موفید و موستەفادی
بێ شوبھە مورید و ھەم مورادی
نووری تو د حوسنێ ڕوویێ دلدار
ناری تو د قەلبێ عاشقێ زار
شەمعی نە ژ قسمێ نوور و ناری
شەمسی ژ عەیان تو پەردەداری
گەنجی تو د نیڤ تلسمێ عالەم
کەنزی تو عەیان ژ ئسمێ ئادەم
ئەڤ عالەم و ئادەمی و مەشھوود
ئەڤ مومکن و ماسوایێ مەوجوود
ھەمیان ب تە یە مەدارە و دەبر
فەییازێ ریازێ خەلق و وەلئەمر
ئەمرێ تە ب لەفزێ کنْ دو عالەم
مەوجوود کرن غەرەز چ ئادەم
ئادەم ب خوە یەک ژ ھەردوانە
یەک حەرف ژ ئەمرێ کنْ، فکانَ
ئەو حەرفە حەقیقەتا موحەققەق
ھەم ئەمرە ب قودرەتا تە ھەم خەلق
ئەشباح مورەسسەمن ژ ناسووت
ئەرواح موەسسەمن ب لاھووت
ئەڤ رووح و جەسەد ب جەبر و ئکراھ
تەزویج بووین ب ئەمرێ ئەللاھ
ناسووتی ئەگەر چ ڕەنگ سوفالە
لاھووتی ژ پەرتەوا جەمالە
حەرفا کو مە گۆتی نەقشێ ھوورە
لێ مەقسەد و مەعنەیا وێ کوورە
زاھر تە ئەگەر نومایە سوغرا
باتن ئەوە نەقشێ خامە کوبرا
مەوجوودە د وێ شەھادەت و غەیب
مەشھوودە د وێ سیادەت و عەیب
ئنسان ب خوە ھەم زەلامە ھەم نوور
ئادەم ژ تە ھەم قەریبە ھەم دوور
ھندی وەکو جنسێ عالەمینە
ئەو تابعێ نەوعێ ئادەمینە
ئەڤ ڕەنگە فەلەک ھەمی موعەززەم
ئەڤ چەندە مەلەک ھەمی موەکەررەم
ئەڤ کارگەھا عەزیمە دەووار
ئەڤ بارگەھا بەدیعە سەییار
ئەڤ چەندە زەمین د گەل عەناسر
ئەڤ ڕەنگە عەرەز د گەل جەواھر
ئەڤ چەندەھە نعمەت و نەفائس
ئەڤ ڕەنگەھە مەئکەل و مەلابس
ئەڤ چەندەھە موددەعا و مەتلووب
ئەڤ ڕەنگەھە موشتەھا و مەحبووب
حەیوان و مەعادن و نەباتات
مەتلووب و مەقاسد و مورادات
بلجوملە ژ بۆ مە ڕا ل کارن
فیلجوملە ژ بۆ مە بوردەبارن
حەققا کو تە خوەش نزام و رەونەق
تەرتیبکرن ژ بۆ مە ئەلحەق
ئەم غافل و عاتل و گونەھکار
مایینە د قەیدێ نەفسێ ئەممار
نینن مە د قەلبی فکر و زکرەک
ناکن ب زەبانی حەمد و شوکرەک
خانی کو نھن ب قەلبێ زاکر
باری بدە وی زەبانێ شاکر
شێوازی MLA & APA بۆ شیعری سەرھێڵ
ئەحمەدی خانی. «مەم و زین/٠١». ڤەژین بوکس. www.vejinbooks.com. سەردانی ڕێکەوتی ٢٠١٩/١٠/٢٢.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.