شاعیر: ئەحمەدی خانی (١٦٥٠-١٧٠٧)
زمان: کوردیی باکووری
قاڵب: مەسنەوی
کێش: مفعولُ مفاعلن فعولن 
{literal} {/literal}
سەبەبێ نەزما کتابێ ب ڤی ئەزمانی د سوورەتێ شەکوایا ژ دەورانی و گلیا ئەنبائێ د زەمانی کو ل بال وان یەکسانە ھونەردانایی دگەل عەیبا نادانی
خانی ژ کەمالێ بێ کەمالی
مەیدانێ کەمالێ دیت خالی
یەعنی نە ژ قابلی و خەبیری
بەلکی ب تەعەسسوب و عەشیری
حاسل ژ عناد ئەگەر ژ بێ داد
ئەڤ بدعەتە کر خلافێ موعتاد
سافی شەمراند ڤەخوار دوردی
مانەندی دەری لسانێ کوردی
ئینایە نزام و ئنتزامێ
کێشایە جەفا ژ بۆ وی عامێ
دا خەلق نەبێژتن کو ئەکراد
بێ مەعرفەتن بێ ئەسل و بنیاد
ئەنواعێ ملەل خودان کتێبن
کورمانج تەنێ د بێ حسێبن
ھەم ئەھلێ نەزەر نەبێن کو کورمانج
عشقێ نەکرن ژ بۆ خوە ئامانج
تێکدا نە د تالبن نە مەتلووب
ڤێکڕا نە موحببن و نە مەحبووب
بێ بەھرەنە ئەو ژ عشقبازی
فارغ ژ حەقیقی و مەجازی
کورمانج نە پڕ د بێ کەمالن
ئەمما د یەتیم و بێ مەجالن
في الجمله نە جاھل و نەزانن
بەلکی د سەفیل و بێ خودانن
گەر دێ ھەبووا مە ژی خودانەک
عالی کەرەمەک لەتیفەدانەک
علم و ھونەر و کەمال و ئزعان
شعر و غەزەل و کتاب و دیوان
ئەڤ جنس ببا ل با وی مەعموول
ئەڤ نەقد ببا ل نک وی مەقبوول
من دێ عەلەما کەلامێ مەوزوون
عالی بکرا ل بانێ گەردوون
بیناڤە روحا مەلێ جەزیری
پێ حەی بکرا عەلیێ حەریری
کەیفەک وە بدا فەقیھێ تەیران
حەتتا ب ئەبەد بمایی حەیران
چ بکم کو قەوی کەسادە بازار
نینن ژ قوماشی ڕا خەریدار
خاسما د ڤی عەسری دا کو ھەمیان
مەعشووق و حەبیب بوونە ھەمیان
یەعنی ژ تەمەع دراڤ و دینار
ھەر یەک ژ مە ڕا وە بوونە دلدار
گەر علمی تەمام بدی ب پۆلەک
بفرۆشی تو حکمەتێ ب سۆلەک
کەس ناکەتە مەیتەرێ خوە جامی
ڕاناگرتن کەسەک نزامی
وەقتێ کو مە دی زەمانە ئەڤ ڕەنگ
في الجمله ل سەر دراڤی بوو جەنگ
حەزکر مە ببینە کیمیاگەر
گاڤا کو مە دی نەبوو مویەسسەر
نسفییە مە پێلەکێ عەمەل کر
تەسفییەیێ جەوھەرێ دەغەل کر
قەلبێ مە نەکر قەبوول حیلە
قەت بوو غەرەزێ نەبوو وەسیلە
دین چوو و نەکەت ب دەست مە دینار
پاشی ژ نەچاری بووینە سەففار
سفرێ خوەئێ خەف مە ئەشکەرا کر
قرتاسیە بوو مە لێ دوعا کر
دەعوەت گەڕیا ب سدق ئجابەت
بوو واستەئێ قەزایێ حاجەت
ئەڤ پۆل ئەگەر چ بێ بەھانە
یەک ڕوونە و ساف و بێ بەھانە
بێ حیلە و خوردە و تەمامن
مەقبوولێ موعامەلا عەوامن
کورمانجیە سرفە بێ گومانە
زێڕ نینە ببێن: سپید مانە
سفرێ مە ئێ سۆرە ئاشکارە
زیڤ نینە ببێن کو کێم عیارە
نەقدێ مە مەبێژە: کێم بھایە
بێ سککەئێ شاھێ شەھرەوایە
گەر دێ ببوا ب زەربێ مەنقووش
نەدما وەھە بێ رەواج مەغشووش
مەحبووبە ب کەس نە نامزادە
لەو بەخت سیاھ و نامورادە
قرتاسیەیا مە بێ پەناھان
بێ زەربێ قەبوولێ پادشاھان
مەعموولە ل با گەلەک عەلیمان
مەقبوولە ل با گەلەک حەکیمان
لێ حاکمێ وەقتێ مەعرەفتناک
مەسمووع نەکر ب سەمعێ ئدراک
میرێ کو ب ناڤێ میرزایە
مەحزا نەزەرا وی کیمیایە
قەلبێ د زەغەل دکەت بلۆری
پۆلێ د دەغەل دکەت فلۆری
سەد بار ھەبن فلووسێ ئەحمەر
دەر حال دکەت ب یەک نەزەر زەر
ئەعلایی دکەت ب قەھرێ ئەدنا
ئەدنایی دکەت ب لوتفێ ئەعلا
پاشان دگرت وەکی ئەسیران
ئازا دکەتن وەکی فەقیران
ھەر ڕۆ ژ ھەزار بێ نەوایان
ھەر لەحزەب لوتفێ سەد گەدایان
زەنگین دکەتن ب دەستێ ھممەت
حکمەت ئەڤە ناکەتن چو مننەت
گەر دێ وی نەزەر بدا مە جارەک
ئکسیرێ تەوەججوھا موبارەک
ئەڤ قەول ھەمی دکرنە ئەشعار
ئەڤ پۆل ھەمی دبوونە دینار
ئەمما نەزەرا وی زێدە عامە
لەو خاس نەزەر ژ دل نەدا مە
ئەو رەحمەتێ خاسسە بۆ عەوامێ
یا رەب تو بدی وی ھەر دەوامێ
شێوازی MLA & APA بۆ شیعری سەرھێڵ
ئەحمەدی خانی. «مەم و زین/٠٦». ڤەژین بوکس. www.vejinbooks.com. سەردانی ڕێکەوتی ٢٠١٩/٠١/٢٠.
ئەگەر لەم دەقەدا ھەڵە یان کەموکۆڕی ھەیە تکایە بۆ ئاگادارکردنەوەمان لەسەر ئەم دوگمەیە کلیک بکە: فۆرمی پەیوەندی.