ڤەژینبوکس
ڤەژینبوکسقانعگوڵاڵەی مەریوان › م › شەوێ پیری خەراباتی ئیشارەی جامی مەی کردم
نووسەر:
قانع (1898-1965)
زمان:
کوردیی ناوەندی
قاڵب:
غەزەل
کێش:
مفاعیلن مفاعیلن مفاعیلن مفاعیلن ∪–––/∪–––/∪–––/∪–––
هزج مثمن سالم
visibility 24 timer 1 خولەک
شەوێ پیری خەراباتی ئیشارەی جامی مەی کردم
خەراباتی
شەوێ پیری خەراباتی، ئیشارەی جامی مەی کردم
تەماشا کە! لە ئەم لوتفە، حەواڵەی تەختی کەی کردم
لە چۆڵی جەهلەدا خنکاو و تینوو و بێ سەر و پێ بووم
بە ماسی بەحری زانینی، بەبێ تەنکاو و پەی کردم
لە عیلمی بادەنۆشی تێپەڕیم بۆ زاری و شیوەن
بە ئوستادی کەمانچە و عوود و تار و ساز و نەی کردم
کلیلی باخی دا دەستم، کە چوومە ناو گوڵ و گوڵزار
لە لەرزە و شانەکسکێی بەفر و سەرمای مانگی دەی کردم
وەها فێری مەلەی کردم، لە بەحری وەحدەتا ئەمڕۆ
لە گۆرانی بە باڵای چەشنی سەرو و مەمکی بەی کردم
چ ئومێدی بوو یا ڕەببی بە تەنیا یەک نەزەر قانع
بە سوڵتانی خەیاڵات و بە شاهی شاری ڕەی کردم
navigate_nextئەی لە بەختی عاشقی ئاوارەکەت ڕژد و چرووک
navigate_beforeکەرێکم بوو چ کەر وەک با و بۆران